[飲食] Yo Mama - 甜甜酸酸冰凍Yo Mama

Yo Mama (店鋪Facebook Page請點左邊店名)

銅鑼灣告士打道311號皇室堡4樓404號舖

Frozen Yogurt (Froyo) 鋪頭嚟講, Yo Mama 係唔玩花臣嘢嘅實力派嚟, 目前式微緊嘅時候仲存在而且品質都Keep到

Original Yogurt + Taro Mochi $31

CHECK POINT!
1. Froyo 唔易溶, 乳酸味突出, 甜度平衡
2. Taro Mochi 質感處於回彈同軟糯中間, 食到自然芋頭味

口味唔會太甜加上佢地自家Mochi真係好得, 好夾呢個Combination, 食完零罪惡感, 哈哈哈

[飲食] Elephant Grounds(黃竹坑店) - 可以讓你每天都見到大象的Coffee x Kitchen Cafe

Elephant Grounds(黃竹坑店) (店鋪Facebook Page請點左邊店名)

香港仔黃竹坑業發街1號The Factory 1 樓

位於一座畫滿美式漫畫大廈入面, 未食先行感受一種「潮」味。不愧係名人有份合作嘅Cafe。正值返工時間, 店內客量不多, 霞姨港女Mode啟動, 非常開心地影相:)


雖然店面比上環店更大, 但一改上環店「麻雀雖小但五臟俱全」的產品密密麻麻感覺, 倘大空間加上以自然同埋木做主題, 突顯放鬆氛圍外, 更添外國感。

Latte
紙杯上嘅咖啡令霞姨有d詫異, 打開杯蓋花已散。叫Latte 睇唔到靚靚拉花太可惜。後來店員提到工廠內只可以提供Take away包裝。外賣紙杯係靚嘅, 拎上手感覺良好。

Latte 可嚐到堅果味, 溫和平易近人且順滑, 冷卻後才略顯苦澀。飲落舒適。

Ice-Cream Sandwich (Pecan cookies with dehydrated bananas and toasted pecans)
霞姨見到呢個三文治, 只可以講:「係一件雪糕藝術品」, 未食已讚嘆。霞姨上年冬天特登去歌賦街食唔到, 宜家拎起手真係有少少...「YEAH!我買到喇!」嘅感覺。

曲奇同雪糕質感好夾, 咬落去外層略脆內裡偏濕潤嘅Pecan 曲奇唔會因為擠壓令雪糕散開, 嘴角係Keep到乾淨:) 店家IG 提到雪糕係Rum酒雪糕? 可惜霞姨又不太食到酒味, 牛奶味重且幼滑, 內有Pecan 。香蕉片好食! 

整體唔會太甜膩, 剛好。價位嚟講, 餅亁加雪糕嘅角度, 霞姨覺得店家價位定位偏向「藝術品」價格, 間唔中食下係幾開心嘅

P.S: 沙律吧同Menu上面嘅食物都吸引, 可惜Lunch Hour 未到, 有無同好有好介紹:)?

飲完咖啡等三文治期間又再睇睇店家精品系列, 有雜誌有衫有袋有調味品, 部份更加印有Signature 大象圖案。睇嚟喜歡呢類設計嘅朋友真係要比Credit Card先落到樓。

By the way, 霞姨隻錶都係購自上環分店, 好開心喺黃竹坑都見到:) 嚟緊換錶又可以買返同一款, 哈哈哈~!

[飲食] Coffee Job - Are You Looking For "Coffee Jobs"?

Coffee Jobs (店鋪Facebook Page請點左邊店名)

九龍廣華街3號百利達廣場地下3號舖 

悠閒氣氛、 石牆設計、黑板、木檯同櫈、工匠專用式嘅圍裙...基本上係近年香港咖啡店基本。Coffee Jobs 都有呢d 基本元素, 另加唔需要拉門就可以行入去, 多咗一種親切感。不過因為始終係旺角區食店, 人流都會比較多。有時霞姨都覺得自己比較幸運, 唔使等位又有得坐:)

Green Tea Latte

店家做法以茶同咖啡融合，同一般坊間Green Tea Latte嘅茶加奶組合唔一樣。霞姨覺得店家嘅呢一杯可以叫做精品抹茶鴛鴦XD香氣以茶為主，飲落茶與咖啡味道平衡，After Taste可以嚐到抹茶特有茶澀味, 帶點微酸, 飲落舒適。

Flat White

友人見到之後嘅第一個反應係：「嘩！我唔捨得飲！」雕花實在精緻, 奶泡又幼滑。飲落可以嚐到果仁杏仁味道，又有milk chocolate味，偏Milky。

水牛城雞翼

本以為會帶點點辣味，仍然惹味。乾脆外表封住原有肉汁，叉拮落去之後肉汁就流出嚟：) 點埋伴隨嘅甜度較強嘅沙律醬，解除油膩感。味道剛好。

雙色芝士焗薯條

霞姨喜歡食薯條, 而呢個薯條已經係我薯條排行榜上面名列三甲之一。雖然因為店面比較忙, 已經放置咗一陣, 理論上會回溫、口感變差。但呢個薯條只係芝士變返固態無拉絲效果, 輕輕鋪上香辣粉嘅薯條外層非常非常脆, 內裡薯蓉亦幼滑有薯味。配搭芝士有Cheddar 同Monterey Jack Cheese, 呢個組合本身同薯條已經係天衣無縫。希望以後每一次都可以食到同樣味道:)

New York Cheese Cake

由老闆娘特製。表面輕輕有再上色。芝士軟身幼滑所以上檯前蛋糕前尖角位就輕微裂開...但不減風味。餅底偏濕潤。芝士味有餘韻。

Rose Latte

多謝咖啡師Kenneth邀請霞姨品嚐同埋參觀製作過程:)可惜無拍片, Kenneth實在好快手就已經整好咗...

在於一個普通客人嘅角度, 其實唔會有好多個會在意一杯咖啡生成, 一杯咖啡presentation成為重要一環。霞姨將咖啡捧喺手嘅時候, 可以聞到淡淡咖啡同玫瑰香混合. 而雕花圖案同玫瑰花瓣組合更impressive - 一枝盛開玫瑰花, 一片片花瓣散落於地。(忽發奇想聯想到, 莫非呢個構思嚟自「落紅不是無情物，化作春泥更護花」一句?哈哈哈)

味道方面玫瑰味突出而甜味無Over, 另一方面仍然可以嚐得出Milky同Nutty口味, 飲落舒適:)

[飲食] Issaya Siamese Club - 環境味道滿分但服務………嘅「亞洲最佳50餐廳」泰國Club?

 Issaya Siamese Club (店鋪Facebook Page請點左邊店名)

銅鑼灣登龍街1-29號金朝陽中心2期Midtown25樓全層

備受國際提名「亞洲最佳50餐廳」其中一間竟然係有"Club"字眼嘅一間餐廳。 小妹好疑惑，難得襯住同姊妹一聚, 決定一試「亞洲最佳50餐廳」嘅真實龍與鳳! 整體食物係非常好!環境亦一流! 係服務令小妹卻步。

先講令小妹扣分嘅位。禮貌嚟講係扣分扣得比較嚴重。所以評分由好評變一般。

1.  當時大概8點晚飯時間, 小妹同友人收到就只有Drink Menu, 搵咗陣都唔見Food Menu, 之後再問店員先拎嚟。

2.  最大問題係10分鐘內催落Order 3次, 環顧四周眼見係最少有10張空枱而無放「留座」牌。

3.  然後店員一直無斟水, 但突然間有一下就問小妹要Tap Water 定要Sparking Water, 小妹揀咗Tap Water但店員拎嚟係一支未開封玻璃樽嘅水。因為有部份餐廳真係無水供應而要買嘅, 心諗都正常。但之後食飯食到尾聲嘅時候又比小妹見到有統一服飾打扮嘅店員用手提水樽(仲要內有檸檬)為其他客人倒水。我地嘅Tap Water 要收錢, 人地就正常水仲要有檸檬味, 即係點呢?

4.  比錢嘅時候小妹係用信用卡要簽名。可能都10點半太攰啦, 身著西裝嘅店員好Causal 地就重重放低簽名簿同單再搭多句「簽名丫!」……。小妹同姊妹們都係食個飯坐咗2個幾鐘左右…身邊仲有好多吉枱同有客人都未走…我地都無阻收工唧-_-

食物非常滿意, 逐一介紹:

香辣醋汁牛柳

牛柳烤熟程度剛好, 肉質以及肉汁都滿意。每件都配上香茅、炸蒜, 另有青瓜或者蕃茄作為配搭。香料味之中帶D肉味又清新,正!

香蕉花伴棕櫚芯沙律

第一啖嘅感覺係脆! 仔細一睇除左有碎脆蕉片、花生、脆小魚之外, 望住一塊塊方形帶點白色脆塊, 係棕櫚芯。香濃花生味之中帶點微辣, 非常惹味南洋風前菜。

香烤豬肋骨配自家醬汁

重頭戲, 豬肋骨。可惜就只得兩件。唔知店家係唔係想營造少食多滋味嘅感覺呢? 肋骨同肉非常容易分離, 咬落去亦非一般美式豬肋骨比較乾身而係肉質鮮嫩又多汁, 領教到雜誌上所提到「3小時熬製」嘅風味。香茅味伴隨著嘅柔和嘅甜味同輕微嘅辣味, 層次豐富而又不蓋過豬肋骨原味…..兩位友人同小妹都覺得係非常出色嘅作品。

胡椒香草大虎蝦

可以品嚐到大蝦爽口彈牙, 醬汁有中式風味, 同時胡椒、蒜同香料味亦有於after taste同時滲出。蝦頭嘅蝦膏非常多, 小妹用叉輕輕一拮就吱晒出嚟。咬落亦都鮮味非常。

火焰燒雞

呢個名令小妹聯想<<西遊記>>入面嘅火焰山, 熊熊嘅烈焰…係咁燒呀燒呀~哈哈哈XD上菜嘅時候店員哥哥的確完美演繹咗燒雞一刻。

友人同小妹對呢道菜嘅味道期望比較大(名太有霸氣), 可惜味道同預期有D不一。雞依然鮮嫩亦帶酒香與椰香…但的確係味道比較清淡嘅。

馬沙文咖哩羊膝

賣相精緻, 伴有原塊蒜頭以及薯仔。用刀分開羊膝嘅一刻, 已相信店家對燉煮非常暸如指掌。羊膝有住一重唔會令人失望嘅鮮嫩多汁, 同時亦非常冧。咬落羊騷味唔重, 汁亦無預期嘅濃味。

石鍋蘑菇五穀飯

五穀飯故名思義係有咬口。望著一粒粒紅米、黑米、糙米仲有薏米配搭上腰果嘅組合感覺非常健康。可惜嘅係蘑菇較少, 但仍然有菇鮮味。鮮味中仍見蒜香, 亦滋味。

茉莉花奶凍米雪糕

最後作結嘅甜品令小妹非常IMPRESSIVE !! 奶凍好好食!! 清新又濃郁茉莉花味食起嚟像真唔虛假。(咁啱同場友人亦叫Jasmine, 好似品評緊佢咁, 哈哈)花香之中亦見奶味, 淡淡花香餘韻令人回味。同時位於碟上有粒粒米粒嘅米味雪糕並無喧賓奪主之嫌, 配搭得奶凍非常出色。惟一美中不足應該就係雪糕上面嘅米脆片, 略為有D「痴牙」。整體嚟講, 呢一道甜品係令小妹當晚有一個美好嘅深刻印象為作結。

以食物質素、份量同整體價格嚟講係性價比非常高的。希望店家追求食物質素同時亦多注意服務層面小細節J

[飲食] NOC coffee & roaster - OL 攝石。暖男CAFÉ/鬼佬攝石

NOC coffee & roaster(店鋪Facebook Page請點左邊店名)

中環嘉咸街34號地下

假期又到~!潮拜新隱世COFFEE SHOP!

小妹終於可以一試雜誌上面超人氣NOC coffee & roaster! 位於中上環交界，小店雖小但五臟俱全，無論店舖外內設計、menu、coffee bar枱定係高身櫈以至店內音樂(包括客人，其實小妹覺得本篇標題亦可改為「鬼佬攝石」，哈)都充斥住一種「洋」味，令小妹多少有d惦記住以前喺澳洲嘅日子呢。

踏進店內，咖啡芳香同親切女店員的笑容令人非常舒暢，即使非常忙碌女店員亦不忘幫忙Set 位，非常有Heart!

Black Pepper Ham Sandwich

坐喺coffee bar枱望住店員(相信係店主Benny)用心準備同拼湊一份三文治，未食之

前已感受到佢對食物以及客人嘅尊重。雜誌上面提到三文治並非塗上牛油而用蛋液代替再煎香。果然蛋味突出而又保持到五穀包鬆軟，咸度剛好，加上旁邊新鮮沙律菜點綴，整體味道平衡。

Latte(+Rose)

小妹本身口味有少少偏淡，所以覺得係甜咗少少之外，加埋個靚靚拉花，係滿意嘅。Latte即使放置咗一陣並無大氣泡出現，飲落去口感亦都豐富綿滑，咖啡味之中有陣陣奶香再配上濃郁玫瑰花香味交融~玫瑰味道可以飲到唔係劣質糖漿，香味至味道都真實。

Hand Drip – Kenya

去咖啡店飲Hand Drip是常識吧~!

甜酸苦辣之中小妹感覺麻麻係苦味，經Sam 介紹之後最後選擇咗味道偏酸嘅水洗Kenya。此Hand Drip易入口，酸中帶點回甘。香氣純淨樸實。即使同行友人對手沖咖啡並無特別認識亦覺得感覺甚好。飲到底嗰時發現~原來玻璃容器由特色傢俱店Francfranc出品，有生活品味。

於臨走時Sam友善提到「要再嚟呀!」， 實在窩心，果然係暖男CAFÉ！相信有興趣品味或者交流咖啡又想食少少輕食嘅大家都會喜歡NOC coffee & roaster :)

雖然因為人多關係而需要等位同會坐得比較擠迫。但整體小妹係Enjoy~

P.S: 言談之間亦有提到平日4點後會相對嚟講比較人少，唔太喜歡等位或者人太多的話可以考慮個出發時間~