[飲食] Bread and Bistro - It’s a Breakfast Time~! 要揀麵包?蛋糕?雪糕定鋒味月餅呢?

Bread and Bistro(店鋪Facebook Page請點左邊店名)

Shop G06 One lsland South 2 Heung Yip Road Wong Chuk Hang

隨住港鐵南港島線啟動嘅日子愈嚟愈近, 愈嚟愈多Café 同食店都進註咗呢個小小嘅黃竹坑工業舊區。Bread and Bistro, Bread, 顧名思義造包嘅, 仲要放喺前面做第一個字, 霞姨係相信好厲害。之前因為趕住返工關係喜歡包點嘅霞姨都只係可以匆匆買個包就走, 難得今日可以偷少少時間。悠閒一刻開始~

宇治抹茶黑豆包

外表望上去係同其他麵包店嘅燒餅差不多, 平實。咬落去抹茶包比預期硬身少少, 但Impressive係霞姨以為內餡會用上豆蓉, 但取之代之係一粒又一粒分明嘅糖漬黑豆。糖漬黑豆就咁食會比較甜膩, 配上抹茶包味道啱啱好。

迷你法國芝士麵包

因為法國包關係, 外層一如以往硬身同麵包內部會有煙韌口感。特別嘅係外層有脆身芝士同內層有帶甜味道嘅Emmental Cheese。加上麵包內帶有芝麻, 層次又豐富少少。

店員有貼心地過嚟詢問麵包好食與否, 見霞姨有提到有口感比預期硬, 就即刻拎咗一塊已切片同烤焗過嘅芝士麵包嚟同埋介紹食法, 真係一個好nice嘅姨姨:)

Royal Milk Tea

英國紅茶會比較順口茶味柔和, 淡奶味偏突出。

一邊食緊早餐嘅時候, 麵包師一邊喺落地玻璃嘅餅房(霞姨覺得有D似桑拿房呀XD)拎包出嚟, 望住店員將一個個新鮮麵包上架…係幾舒服

食完呢個一共$24早餐(一個包加奶茶)之後有再喺店舖內睇一睇, 發現售賣麵包嘅地方有一盒一盒嘅鋒味月餅。之前霞姨有聽聞過買鋒味曲奇係要排好耐隊。宜家鋒味月餅就喺眼前…估唔到謝霆鋒都進註黃竹坑了…

另外再細心一睇Cake櫃嘅蛋糕由2/3 Dolci 製作~雪糕亦都係, 睇嚟喺工業區想食Gelato又有好去處:)

****要到訪嘅朋友請注意星期日係唔開的****