[飲食]炊豕店 - 平民價格食完美香港風味

炊豕店(店鋪Facebook Page請點左邊店名)
銅鑼灣加路連山道11號地下


小妹覺得一間食店之所以可以愈撈愈大, 一定有佢過人之處。炊豕店限制食客口味主打食豬, 專精落力研發豬扒/肉燥再配搭70年代(小妹覺得仲帶有少少東洋感覺!) 嘅室內外店面裝潢。唔講價錢(因為一定係平啦), 論環境同食物味道小妹都覺得好正~!

 以前店面細小同窄, 除左要等位之餘用餐地方都唔大。宜家轉左地址之後格局大咗位又多咗位, 小妹同友人好好彩唔使等位就可以直接Walk-in。希望日後多人知道已經重開嘅消息之後, 小妹依然幸運地唔使等位XD

秘製豬扒(肉燥汁)跟撈粗麵+滷水雞蛋

豬扒咬落酥軟有酒香, 炸粉唔厚兼帶有煙韌感, 並非一味「脆」。豬味於吞嚥之後仍然可以感受到。揭開豬扒之後會見到一粒粒大小同女仔尾指大小差唔多嘅肉燥。肉燥口感咸香帶微甜, 脂肪係入口即融, 非常有風味。小妹其實有D怕怕脂肪嘅, 但係呢種肉燥就令小妹會有食晒原粒肉燥連嘅脂肪衝動。
惟一美中不足係麵條雖仍彈牙但醬汁於小妹嚟講比較咸。幸好小妹有跟餐配上一杯香片, 洗刷咗口內咸度之後再感受茶香, 仍然滿意。

滷水雞蛋可清楚嚐到雞蛋原味, 同滷水配合度剛好, 一切都平衡。

滷水雞翼

望上去顏色非常深, 本以為會好濃味。但咬落醃得入味又不會太咸又有點點甜味滲出。20蚊3隻, 實在抵食。不過如果以2人份量為基礎的話就平分唔到。好彩今次唔使猜包剪揼, 第3隻雞翼係我嘅XD

整體嚟講係非常滿意! 係座位方面仍然比較窄, 不過明嘅…香港地。但環境食物質素一流~!

P.S: 小妹食完之後漏低咗嘢, 經過嘅廚師叔叔友善咁比番我, 店員們真係好NICE:)